بابەتە سەرەکیەکە: سەرۆککۆماری ئێران رایگەیاند، ئێران هەرگیز پلان و نیازی تیرۆرکردنی دۆناڵد ترەمپی نەبووە، هیچ هەوڵێکمان لەو بارەیەوە نەداوە.

لێدوانی فەرمی: مەسعود پزیشکیان سەرۆککۆماری ئێران لە چاوپێکەوتنێکدا لەگەڵ ئێن بی سی نیوز رایگەیاند: هیوادارم ترەمپ ببێتە هۆی ئاشتی ناوچەیی و جیهانی و بە پێچەوانەوە بەشداریی لە خوێنڕشتن یان شەڕدا نەکات، وەڵامی هەر هێرشێک دەدەینەوە، ئێمە لە شەڕ ناترسین، بەڵام بەدواشیدا ناگەڕێن.

ئەمەشی وت: هەموو ئەو کارانەی تا ئێستا کردوومانە ئاشتیانە بووە، ئێمە بەدوای دروستکردنی چەکی ئەتۆمیدا نین، بەڵکو ئەوان تۆمەتبارمان دەکەن بەوەی هەوڵی دروست کردنی بۆمبی ئەتۆمی دەدەن.

زیاتر: لە وەڵامی پرسیارێکدا کە ئایا دانوستانی راستەوخۆ و ئاشکرا لەگەڵ ترەمپ دەبێت؟ پزیشکیان وتی: کێشەکە لە گفتوگۆدا نییە، کێشەکە لەو بەڵێنانەدایە لە گفتوگۆکانەوە سەرهەڵدەدەن، کە لایەنی بەرامبەر بەڵێنەکانی جێبەجێ نەکرد و رێزی لە بەڵێنەکانی ناگرێت.

چی تر: سەبارەت بە بانگەشەکانی رۆژئاوا کە ئێران هەوڵی تیرۆرکردنی دۆناڵد ترەمپ دەدات، پزیشکیان رایگەیاند، ئێران هەرگیز پلان و نیازی تیرۆرکردنی دۆناڵد ترەمپی نەبووە، هیچ هەوڵێکمان لەو بارەیەوە نەداوە و لە داهاتوودا هیچ هەنگاوێک ناگرینەبەر.