بە مەبەستی گفتوگۆکردن سەبارەت بە چارەسەرکردنی کێشەکانی کەرتی غەززە، چەند وەزیرێکی دەرەوەی وڵاتانی عەرەبی بەرەو چین بەڕێکەوتن.
میدیا عەرەبییەکان بڵاویانکردەوە:" شاندێک لە وەزیرانی دەرەوەی وڵاتانی عەرەبی بەرەو چین بەڕێکەوتوون بە هیوای دۆزینەوەی چارەسەرێک بۆ قەیرانی مرۆیی غەززە".
ئاماژەیان بەوەشکرد:" ئەو شاندەی کە بەرەو چین بەڕێکەوتوون پێکهاتووە لە وەزیرانی دەرەوەی ئوردن، ئیندۆنیزیا، سعودییە، میسر، بەرپرسانی فەڵەستین  و سەرۆکی رێکخراوی هاوکاری ئیسلامی".
هاوکات نوێنەری وەزارەتی دەرەوەی چین ئاشکرایکرد، لە گەشتەکەی وەزیرانی دەرەوەی وڵاتانی عەرەبی بۆ وڵاتەکەی گفتوگۆی قوڵ لەبارەی کەمکردنەوەی گرژییەکان لە غەززە و پاراستنی خەڵکی سڤیل و چارەسەرکردنی کێشەکان دەکرێت.
شایەنی باسە چین یەکێک لەو وڵاتانەی لەدوای دەستپێکردنی جەنگی نێوان چەکدارانی حەماس و سوپای ئیسرائیلەوە داوای راگەیاندنی ئاگربەستی کردووە و جەختیلەوەشکردووەتەوە، هەرکارێک بۆ گەڕاندنەوەی ئاشتی گونجاوبێت ئامادەیە ئەنجامی بدات.