بابەتە سەرەکیەکە: سەرۆک وەزیرانی عێراق بەبۆنەی ساڵرۆژی هێرشەکەی 7ـی ئۆکتۆبەری حەماس بۆ سەر ئیسرائیل پەیامێک ئاراستەی جۆ بایدن سەرۆکی ئەمریکا دەکات.

راگەیەندراوی فەرمی: نووسینگەی محەمەد شیاع سودانی سەرۆک وەزیرانی عێراق بڵاویکردەوە: ئه‌مڕۆ له‌به‌ر ڕۆشنایی ئه‌و كاردانه‌وه‌ مه‌ترسیدارانه‌ی ناوچه‌كه‌ رووبه‌ڕوی ده‌بێته‌وه‌، په‌یامه‌كه‌مان ئاراسته‌ی هه‌موو دۆستان ده‌كه‌ین، به‌تایبه‌ت جۆو بایدن سه‌رۆكی ئه‌مریكا و وڵاتانی یه‌كێتی ئه‌وروپا كه‌ له‌سه‌ر لێواری خلیسكانێكی مه‌ترسیدار وه‌ستاوین كه‌ ڕه‌نگه‌ ناوچه‌كه‌ و جیهان به‌ره‌و شه‌ڕی به‌رده‌وام رابكێشێت.

ئەمەش هەیە: ئه‌مه‌ش ئابوری جیهانی ده‌هه‌ژێنێت و گه‌شه‌سه‌ندن ده‌خاته‌ مه‌ترسییه‌وه‌ و به‌ره‌و پاشه‌كشه‌یه‌كی گه‌وره‌ی ده‌بات، به‌ تایبه‌ت كه‌ ناوچه‌كه‌مان نوێنه‌رایه‌تی ئه‌و سییه‌ ده‌كات كه‌ جیهان به‌ وزه‌ لێیه‌وه‌ هه‌ناسه‌ ده‌دات.

ئەمەشی وت: پێویستە هەڵوێستی ئیمانوێڵ ماكرۆن سەرۆكی فەرەنسا بەرزبنرخێنین كە داوایکرد چەک نەدرێتە ئیسرائیل و كار بكرێت بۆ كۆتاییهێنان بەو جەنگە، ئەم هەڵوێستەش لە هەستکردن بە مەترسیداری دۆخی ناوچەكەوە سەرچاوەی گرتووە.

چی دیکە: حكومەتەکەمان هەوڵی زۆری داوە بۆ دوورخستنەوەی عێراق لە كاریگەری ئەو ئاڵۆزییانە، لەم کارەشدا بە پاڵپشتی ئێوە و هەموو دۆستانی جیهان سەركەوتوو بووین، قۆناغی داهاتووش ئەوە دەخوازێت هەوڵەكان چڕتر بكەینەوە.

زیاتر: لەسەروو هەموو شتێكیشەوە وەستاندنی بە ئامانجگرتنی هاوڵاتییانی مەدەنی، رزگاركردنی ناوچەكە لە هەڵگیرسانی جەنگێكی نەبڕاوە، کە هیچ كەس تێیدا براوە نییە و تەنها كوشتن و وێرانكاری لێدەكەوێتەوە، هەوڵەكانیشمان لەپێناو هێوركردنەوەی دۆخەكە و فراوان نەبوونی ململانێكان بەردەوام دەبێت كە كاریگەرییان بۆسەر ناوچەكە و جیهان دەبێت.