بابەتە سەرەکیەکە: دەستەی پەخشی ئیسرائیل رەشنووسی رێککەوتنی ئاگربەستی لوبنانی بڵاوکردەوە، کە بە سەرۆکایەتیی نێردەی ئەمریکا بۆ ئاگربەست لە لوبنان سەرپەرشتی دەکرێت.

ئەوەی پێویستە بیزانیت: بە گوێرەی ئەوەی دەستەی پەخشی ئیسرائیل بڵاویکردوەتەوە چاوەڕوان دەکرێت رێککەوتنەکە بەمزوانە تەواو بکرێت و ئەمریکا دەیەوێت پێش وادەی بەڕێوەچوونی هەڵبژاردنەکانی سەرۆکایەتی کۆتایی پێبهێنرێت.

ئەمەش هەیە: دەستەکە ئاماژەی بەوەشکردووە، بڕیارە ئەمڕۆ پێنجشەممە  ئامۆس هۆکستن نێردەی ئەمریکا بۆ ئاگربەست، سەردانی ئیسرائیل بکات بۆ کۆتاییهێنان بە وردەکارییەکانی رێککەوتنەکە.

زیاتر: لە زاری بەرپرسانی باڵای ئیسرائیلەوە بڵاویکردوەتەوە کە چانسی سەرکەوتنی پڕۆژەکە لەسەر ئاستی سیاسی زۆرە.

بە گوێرەی رەشنووسەکەی دەستەی پەخشی ئیسرائیل بڵاویکردوەتەوە خاڵەکانی لەمانە پێکدێن؛

- حکومەتی لوبنان سەرپەرشتی فرۆشتنی چەک دەکات.

- سوپای لوبنان تاکە هێزی چەکدار دەبێت لە باشوور و بە درێژای سنورەکان بڵاوەی پێدەکرێت.

- حکومەتی لوبنان دەسەڵاتی پێویست دەداتە هێزەکانی لوبنان بۆ سەرپەرشتیکردنی هاتنی چەک لە سنووری وڵاتەکە.

- ماوەی 60 رۆژ مۆڵەت دەدرێت بە حکومەتی لوبنان تا سەرجەم گروپە چەکدارەکانی چەک بکات.

- دەبێت ئیسرائیل لەماوەی هەفتەیەکدا هێزەکانی لە باشووری لوبنان بکشێنێتەوە و سوپای لوبنان جێگەیان بگرێتەوە و کشانەوەکەش لەلایەن ئەمریکا و وڵاتانی دیکەوە سەرپەرشتیدەکرێت.

- لە ئەگەری پێشێلکردنی رێککەوتننامەکەدا، سوپای ئیسرائیل دەستکراوە دەبێت بۆ ئەنجامدانی ئۆپراسیۆنەکانی لە خاکی لوبناندا.