بابەتە سەرەکیەکە: بە سەرپەرشتی سەرۆکی دەستەی گەشتوگوزار کۆبوونەوەیەک لە دیوانی دەستەی گەشتوگوزار بە مەبەستی بەدواداچوون بۆ کارەکانی ئامادەکردنی رێبەری دەرفەتەکانی وەبەرهێنان لە کەرتی گەشتیاری هەرێمی کوردستان ئەنجامدرا.

راگەیەندراوی فەرمی: راگەیاندن و پەیوەندییەکان دەستەی گەشتوگوزار بڵاویکردەوە: کۆبوونەوەکە بە بەشداری بەڕێوەبەرانی بەبازاڕکردن و راگەیاندن و پەیوەندییەکان لە دیوانی دەستەی گەشتوگوزار و بەرپرسی توێژینەوە و پەرەپێدان و بەرپرسی گەشتوگوزار لە یەکەی راکێشانی وەبەرهێنانی بیانی لە دەستەی وەبەرهێنان بەڕێوەچوو.

ئەمەش هەیە: لە کۆبوونەوەکەدا گفتوگۆ کرا سەبارەت بە ناوەڕۆکی رێبەری وەبەرهێنانی گەشتیاری کە لە لایەن دەستەی وەبەرهێنانەوە بە هەماهەنگی دەستەی گەشتوگوزار کاری لە سەر دەکرێت.

چی دیکە: ئەمەل جەلال، سەرۆکی دەستەی گەشتوگوزار بە بایەخەوە باسی لە بوونی رێبەرێک کرد کە تیایدا دەرفەتەکانی وەبەرهێنان لە کەرتی گەشتیاری هەرێمی کوردستان بخاتەڕوو بە ئامانجی راکێشانی سەرنجی وەبەرهێنەرانی ناوەخۆیی و نێودەوڵەتی.

زیاتر: هەروەها وێڕای دەستخۆشی لە تیمی دەستەی وەبەرهێنان کە قۆناغی باشیان بڕیوە لە تەواوکردنی رێبەرەکە، هاوکات ئامادەیی تەواوی دەستەی گەشتوگوزاری دەربڕی بۆ هەر کارێک پێویست بکات بۆ سەرخستنی ئەم پرۆژەیە.