بابەتە سەرەکیەکە: بافڵ جەلال تاڵەبانی، سەرۆکی یەکێتیی نیشتمانی کوردستان لە دەباشان پێشوازی لە قاسم ئەعرەجی، راوێژکاری ئاسایشی نیشتمانیی عێراق کرد.

راگەیەندراوی فەرمی: نوسینگەی راگەیاندنی سەرۆکی یەکێتی بڵاویکردەوە: لە دیدارێکدا كە جەلال شێخ ناجی، سەرۆکی ئاژانسی پاراستن و زانیاری و هیوا ئەحمەد، سەرۆکی دەزگای ئاسایشی هەرێم ئامادەبوون، پێشهاتە ئەمنی و سەربازییەكان و هەماهەنگیی نێوان هێزە ئەمنییەکانی هەرێمی كوردستان و عێراق بە ئامانجی پاراستنی سەقامگیریی ناوچەكە جەختی لێكرایەوە.

ئەمەش هەیە: لە درێژەی دیدارەكەدا  بافڵ جەلال تاڵەبانی پەرۆشیی یەكێتی بۆ بەهێزتركردنی پەیوەندییەكان و یەكخستنی توانا هەواڵگری و سەربازییەكان دووپاتكردەوە و رایگەیاند، پێویستە هەموو هەوڵەكان لەچوارچێوەی پاراستنی ژیانی خەڵک و سەقامگیریی ناوچەكە بێت، هیچ بوارێک بۆ تیرۆریستان نەهێڵرێتەوە و هیچ بۆشاییەكی ئەمنی نەمێنێت.

زیاتر: سەرۆکی یەکێتی وتیشی: بەداخەوە ئەمڕۆ لە سنووری خورماتوو فەرماندەیەكی ئازای پێشمەرگە، ئەفسەرێک و سەربازێکی سوپای عێراق شەهیدبوون و چەند سەربازێکی دیکەش بریندارن، بۆیە ئەركی هەموولایەكە مەترسییەكان لەبەرچاوبگرن و رێوشوێنی تووندتر و كاریگەرتر بگیرێتەبەر.