بابەتە سەرەکیەکە: سەرۆکایەتی هەرێم بڵاویکردەوە، به‌يانيى ئه‌مڕۆ دووشه‌ممه‌ 2025/1/13 نێچيرڤان بارزانى، سه‌رۆكى هه‌رێمى كوردستان، له‌گه‌ڵ محه‌مه‌د شياع سودانى، سه‌رۆكوه‌زيرانى عێراقى فيدراڵ، كۆبووه‌وه‌.

راگەیەندراوی فەرمی: سەرۆکایەتیی هەرێمی کوردستان رایگەیاند، لە كۆبوونه‌وه‌كه‌دا، گفتوگۆ لەسەر پەرەسەندن و پێشهاتە نوێیەکانی سه‌ر ئاستى عێراق و ناوچەکە کرا.

هاوکات: جه‌خت لە پێویستيی پشتگیريكردنی حکوومەتی فیدراڵ و سەرخستنی جێبەجێکردنی بەرنامەی حکومی کرايه‌وه‌، بە شێوەیەک کە دەستەبەری بەدیهێنانی خواستەکانی هاوڵاتيیان لە سەرانسەری وڵات بکات.

دەشڵێت: له‌ ته‌وه‌رێكى ديكه‌ى كۆبوونه‌وه‌كه‌دا گفتوگۆ لەسەر پرسە خزمەتگوزارییەکانی پەیوەندیدار بە بەرژەوەنديی هاووڵاتییان کرا و باشترین ڕێگەکان بۆ ڕێکخستنی پابەندييه‌كانى نێوان حکوومەتی فیدراڵ و حكومه‌تى هەرێمى كوردستان، بەپێی بنەماکانی دەستوور و یاسا، تاوتوێ كران.

ئاماژە بەوەشکراوە: هەردوولا جەختیان لەسەر گرنگيی هاوکاری و هەماهەنگيی هاوبەش لەنێوان هەموو هێز و لایەنە سیاسییەکاندا کردەوە بۆ ڕووبەڕووبوونەوەی ئاستەنگەکان و لابردنی سەختییەکان لە وڵات، بە شێوەیەک کە بەرژەوەندیی هەموو پێكهاته‌كانى گەلی عێراق بەدی بهێنێت و چەسپاندنی ئاسایش و سەقامگیری و سەروەريی نیشتمانی بەهێز بکات