بابەتە سەرەکیەکە: سەرۆکی جوڵانەوەی نەوەی نوێ لە کۆنگرەیەکی رۆژنامەوانیدا هەڵوێستی جوڵانەوەکەی لەبارەی بەشداریکردن لە حکومەت ئاشکرا کرد.

لێدوانی فەرمی: شاسوار عەبدولواحید سەرۆکی جوڵانەوەی نەوەی نوێ رایگەیاند: لەم دۆخەی ئێستادا ئەگەر دەسەڵاتمان پێنەدرێت بەشدارى حکومەتى هەرێمى کوردستان ناکەین و وەک ئۆپزسیۆن دەمێنینەوە.

ئەمەشی وت: تەنها بۆ وەرگرتنى چەند پۆستێک ناچینە ناو حکومەتى هەرێمى کوردستان، دەمانەوێت حکومەتى داهاتوو کێشەکان چارەسەر بکات بەتایبەتى کێشەى مووچە لەگەڵ بەغدا.

زیاتر: ئەگەر تا رۆژی چوار شەممە دەستەی سەرۆكایەتیی پەرلەمانی كوردستان هەڵنەبژیردرێت، محەمەد سلێمان (سەرۆكی تەمەن لە فراكسیۆنی نەوەی نوێ) دەست لە سەرۆكایەتی پەرلەمان دەكێشێتەوە.

چی تر: ئامادەین لەگەڵ یەکێتی و هێزەکانی دەرەوەی پارتی 50+1 پێکبهێنین بۆ هەڵبژاردنی سەرۆک وەزیرانێک لە دەرەوەی پارتی.

وتیشی: پارتی پێی راگەیاندوین ئێمە پۆستی سەرۆکی هەرێمی کوردستان و سەرۆکی حکومەتمان دەوێت، لەبەرامبەردا شەش وەزارەت و  30 مدیر عام و 20 وەکیل وەزیر بدەن بە نەوەی نوێ، بەڵام ئەمە لەگەڵ پڕۆژەکەی ئێمەدا ناگونجێت و وەک ئۆپۆزسیۆن دەمێنینەوە.