بابەتە سەرەکیەکە: پەروەردەکانی پێنجوین، چۆمان و پارێزگای هەڵەبجە بڕیاریان دا، بەهۆی بەفربارین و سەرماوە سبەینێ لە سەرجەم ناوەندەکانی خوێندن پشوی فەرمی بێت.

راگەیەندراوی فەرمی: هێمن ئیبراهیم قائیمقامی پێنجوێن رایگەیاند: بەهۆی نزمبونەوەی پلەکانی گەرما لەسنورەکە بە راوێژ لەگەڵ بەڕێوەبەرایەتی پەروەردەی پێنجوێن، بڕیارماندا سبەینێ  یەکشەممە، پشوی فەرمی بێت لەسەرجەم خوێندنگاکانی سنوری هەردو ناحیەی گەرمک وناڵپارێز و ناو قەزای پێنجوێن.

هاوکات: بەڕێوەبەرایەتی پەروەردەی چۆمان رایگەیاند: لەپێناو پاراستنی سەلامەتی خوێندکاران لە شەختە و مەترسییەکانی هاتوچۆ، لە سنوری قەزای چۆمان و ناحیە و گوندەکان، سبەینێ لە ناوەندەکانی خوێندن پشو دەبێت.

زیاتر: پشوەکە بەهۆی ئەو شەپۆلە بەفربارینەوەیە سنوری قەزای چۆمان و ناحییەکانی گرتۆتەوە، بەڵام پشوەکە ئەو خوێندکارانە ناگرێتەوە تاقیکردنەوەی بەراییان هەیە.

لەلایەکی دیکەوە: پارێزگای هەڵەبجە رایگەیاند، بەهۆی ئەو شەپۆلی سەرما و بەفرەی روی لە ناوچەکە کردوە سبەی پشوی فەرمییە لە تەوێڵە و بیارە، بەڵام ئەو خوێندکارانەی پۆلی 12 ناگرێتەوە کە تاقیکردنەوەی بەراییان هەیە.