ئەمڕۆ هەڤاڵ ئەبوبەکر پارێزگاری سلێمانی پێشوازی لە کارزان کەریم راوێژکاری سەرۆکی ئەنجومەنی وەزیران بۆ کاروباری وەزارەتەکانی پەروەردە و خوێندنی باڵا توێژینەوەی زانستی کرد و لە پەراوێزی دیدارەکەشیاندا پێی راگەیاند، یادکردنەوەی نوسەری گەورەی کوردستان ئەحمەدی خانی و بڵاوکردنەوەی دەستنووسەکانی پرۆژەیەکی نیشتیمانییە.

 هەڤاڵ ئەبوبەکر پارێزگاری سلێمانی لە راگەیەندراوێکدا لە هەژماری تایبەتی خۆی لە تۆڕی کۆمەڵایەتی فەیسبووک ئاماژەی بەوەکرد:" ئەمڕۆ شەممە پێشوازیمان لە کارزان کەریم راوێژکاری سەرۆکی ئەنجومەنی وەزیران بۆ وەزارەتەکانی پەروەردە و خوێندنی باڵا و توێژینەوەی زانستی کرد، بۆ گفتوگۆکردن لەبارەی یادکردنەوەی نووسەری گەورەی کوردستان و بڵاوکردنەوەی دەستنووسەکانی بە تایبەتی دەستنووسی مەم و زین-ی کە لەلایەن فەریاد فازیل سەرۆکی ئینیستیتوتی کورد لە بەرلین چاپکراوە، لە مەراسیمێکی شایستەدا بە هاوبەشی پارێزگاکان و زانکۆکانی سەڵاحەدین، سلێمانی، دهۆک، هەڵەبجە و سنە".

دیالۆگ لەسەر کۆنفرانسی وەزارەتی پەروەردە تایبەت بە ( ئا، بێ)ی کوردی کراوە

ئەوەشیخستەڕوو:" لە دیدارەکەدا دیالۆگ لەسەر کۆنفرانسی وەزارەتی پەروەردە تایبەت بە ( ئا، بێ)ی کوردی کرا و دوایین پێشهاتەکانی پەیوەندییەکانیشی نێوان کوردستان و عێراق لەگەڵ هیندستان تاوتوێکرا".

بڵاوکردنەوەی دەستنووسەکانی ئەحمەدی خانی پرۆژەیەکی نیشتیمانییە

روونیشیکردەوە:" یادکردنەوەی نووسەری گەورەی کوردستان ئەحمەدی خانی و بڵاوکردنەوەی دەستنووسەکانی لەگەڵ ئەنجامدانی کۆنفرانسی وەزارەتی پەروەردە تایبەت بە ( ئا، بێ) ئەرکێکی نیشتیمانییە و پێویستە گرنگییان پێبدرێ".