محەممەد شیاع سودانی، سەرۆک وەزیرانی عیراق رایگەیاند، لە حکومەتی نوێی عێراقدا هەنگاوی جددی دەنێین بۆ باشترکردنی بەشەخۆراکی مانگانەی هاوڵاتییان و ئەو پرسە لە پێشینەی کارەکانی حکومەت دەبێت.
نووسینگەی راگەیاندنی سەرۆک وەزیرانی عێراق لە راگەیەندراوێکدا بڵاویکردەوە:" ئەمڕۆ شەممە، محەممەد شیاع سودانی، سەرۆک وەزیرانی عێراق لەگەڵ ئەسیر داوود وەزیری بازرگانی عێراق کۆبووەوە و گفتوگۆیان لەبارەی بەشەخۆراکی مانگانەی هاوڵاتییان و بابەتی خۆراک بە گشتی لە عێراق کرد".
"لە کۆبوونەوەکەدا سەرۆک وەزیرانی عێراق جەختیکردەوە، هەنگاوی جددی دەنێن بۆ باشترکردن و بەرەوپێشبردنی بەشەخۆراکی مانگانەی هاوڵاتییان و کاری لە پێشینەی حکومەت پەرەپێدانی بابەتی خۆراک دەبێت لە عێراقدا"، وەک لە راگەیەندراوەکەدا ئاماژەی پێکراوە.
سودانی جەختیشیکردەوە:" حکومەتی نوێی عێراق هەموو رێککارێکی پێویست بۆ رووبەڕووبوونەوە و بنەبڕکردنی گەندەڵی لەهەموو بوارەکاندا دەگرێتەبەر".
ئەمەش لەدوای ئەوەدێت، دوێنێ هەینی لە کۆشکی سەرۆکایەتی وەزیرانی عێراق سودانی سەرۆک وەزیرانی نوێی عێراق لەگەڵ مستەفا کازمی سەرۆک وەزیرانی پێشوو دەستاودەستی دەسەڵاتی کرد.