بەڕێوەبەرایەتی گشتی تەندروستی سلێمانی رایگەیاند، پەتای وەرزی یەكێكە لە هەوكردنە ڤایرۆسییەكان كە لەسەر ئاستی جیهان بە یەكێك لە بەربڵاوترین پەتاكان دادەنرێت و زۆربەی جار لە كاتی گۆڕانی كەش و هەوا توشی مرۆڤ دەبێت.
تەندروستی سلێمانی لە راگەیەندراوێكدا بڵاویكردەوە:" ئەم پەتایە چەند نیشانەیەكی لەخۆ گرتووە و دیارترینیان، بەرزبونەوەی پلەی گەرمی لەش (تا)، كۆكە، لەش داهێزان، بێ تاقەتی، سەر ئێشە و قورگ ئێشەیە و  نیشانەكان دەكرێت لە كەسێكەوە بۆ كەسێكی تر جیاواز بن". 
بۆ ئەوەی لەم پەتا وەرزییە پارێزراو بی ئەم رێنماییانە جێبەجێ بكە: 
1. ڤاكسین : باشترین رێكاری خۆپارێزی دژی پەتای وەرزی بریتییە لە خۆكوتان بە ڤاكسینی دژە ئەنفلەوەنزا ، خۆشبەختانە وەزارەتی تەندروستی توانیویەتی ڤاكسینی دژە ئەنفلەوەنزا لە بنكە تەندروستییە سەرەكییەكان لە هەرێمی كوردستان دابین بكات . ئەم گروپە لە كۆمەڵگا لە پێشینەن بۆ وەرگرتنی ڤاكسینی دژە ئەنفلەوەنزا:
-  ئافرەتی دووگیان.
-  منداڵی تەمەن شەش مانگ تا پێنج ساڵ. 
- كەسانی بەساڵاچوو ( سەروو  ٦٥ ساڵ ).
- ئەو كەسانەی نەخۆشی درێژخایەنیان هەیە.
- پزیشكان و كارمەندانی تەندروستی.

2. گرنگیدان بە پاك و خاوێنی و شۆردنی دەستەكان. 
3. داپۆشینی دەم و لوت لە كاتی كۆكە و پژمین.
4. مانەوە لە ماڵ لە كاتی دەركەوتنی نیشانەكان و پشوودان. 
5. دووركەوتنەوە لەو كەسانەی نیشانەكانی پەتای وەرزییان هەیە. 
6.  دەستنەدان لە دەم و چاو و لوت پێش دەست شۆردن. 

-  لەكاتی دەركەوتنی نیشانەكانی پەتای وەرزی ئەم رێنماییانە جێبەجێ بكە:
1.  پشوودان.
2.  خواردنەوەی بڕێكی باش لە ئاو و شلەمەنییەكان.
3.  گرنگیدان بە خواردنی میوە و سەوزەوات.
4.  هەر كاتێك نیشانەكان قورس بوون و تەندروستیت تێكچوو راستەوخۆ سەردانی پزیشكی پسپۆڕ بكە.