لێپرسراوی ئەنجومەنی پاراستنی بەرژەوەندییە باڵاکانی یەکێتیی
رایگەیاند، حزبەکەی هەمیشە بە گرنگییەوە لە کەرکوکی روانیوە.
جەعفەر شێخ مستەفا لێپرسراوی
ئەنجومەنی پاراستنی بەرژەوەندییە باڵاکانی یەکێتیی نیشتیمانی کوردستان
رایگەیاند:" بەبۆنەی سەرکەوتن و باش بەڕێوەچوونی پڕۆسەی هەڵبژاردنی ئەنجومەنی
پارێزگاکان، کە لە 15 پارێزگای عێراق بە کەرکوکی قودسی کوردستانیشەوە لە 18ی ئەم
مانگە بەڕێوەچوو، پڕ بە دڵ پیرۆزبایی لە سەرجەم لایەنە سیاسییەکانی عێراق و
کوردستان، دەزگا ئەمنییەکان، لایەنە پەیوەندیدارەکانی تایبەت بەم پڕۆسەیە دەکەم کە
ئاسایش و ئارامی بەڕێوەچوونی هەڵبژاردنیان لە ئەستۆ دابوو و بە بێ دروستبوونی هیچ
گرژی ئالۆزییەک لە کەشوهەوایەکی هێمنانە کۆتاییان بەم پڕۆسە پڕ لە دیوکراسییە هێنا".
ئاماژەی بەوەشکرد:" هەڵبژاردنی ئەنجومەنی پارێزگاکانی عێراق کە
کەرکوکی قودسی کوردستانیشی لەخۆ گرتبوو، بۆ ئێمەی نەتەوەی کورد هەڵبژاردنێکی
چارەنووسساز بوو، بە تایبەت دوای ئەو سەرکەوتنە مەزنەی کە (لیستی هاوپەیمانیی
کەرکوک هێز و ئیرادەمانە) بەدەستی هێنا، ئەمەش بە هەوڵ و ماندووبوونی بافڵ جەلال تاڵەبانی
و سەرکردایەتیی یەکێتیی نیشتیمانیی کوردستان و کادیران و جەماوەرە دڵسۆزەکەی
یەکێتی نیشتیمانی بوو، ئەم سەرکەوتنە مەزنەتان لێ پیرۆز دەکەم، گڕوتینی ئێوە و
جەماوەر و دەنگدەرە دڵسۆزەکانی ئەکێتیی نیشتیمانیی کوردستان بەرز دەنرخێنم".
باسی لەوەشکرد:" یەکێتی نیشتیمانی کوردستان هاوتەریب لەگەڵ
مێژووە پڕ سەروەرییەکەی، هەمیشە بە گرنگییەوە لە شاری کەرکوکی قودسی کوردستانی روانیوە،
ئامانجی یەکێتیی بۆ کەرکوک خزمەتکردن و خۆشگوزەرانیی و مافە نەتەوەیی و سیاسیی و
ئیدارییەکان بووە، لەپێناو پاراستنی برایەتی و یەکڕیزی نێوان گشت پێکهاتە رەسەنەکانی
ئەم شارە، دوای پڕۆسەی رزگاركردنی عێراقیش لە ساڵی (2003)وە نوێنەرانی یەكێتیی نیشتیمانی
بوون لە بەغدا کە توانیان ماددەی (58)ی یاسای كاتی عێراق و مادەی 140 لە دەستووری
هەمیشەیی عێراق جێگیر بکەن، كە هەردوو یاساکە تایبەتە بە ئاساییكردنەوەی بارودۆخی
كەركوك و ناوچە دابڕێنراوەکان".
جەعفەر شێخ مستەفا روونیشیکردەوە:" ئومێدەوارم لە دوای راگەیاندنی
ئەنجامی کۆتایی ئەم هەڵبژاردنە، بە زووترین کات پارێزگارێکی کورد بۆ شاری کەرکووکی
قودسی کوردستان دیاری بکرێت، بە هەماهەنگی لەگەڵ لایەنە سیاسییە کوردییەکان،
یەکڕیزی و یەک دەنگیان بکەن بە سەرکەوتنێکی تر بۆ خەڵکی ئەم شارە، بۆ ئەوەی بە
هەموومان بتوانین خزمەتی خەڵکە دڵسۆز و کوردپەروەرەکەی ئەم شارە زوڵم لێکراوە
بکەین، چونکە کەرکووکییەکان هەمیشە پێشەنگ بوونە لە خەبات و قوربانیدان بۆ گەیشتن
بە ئازادی و پاراستنی خاکی پیرۆزی کوردستان".