بابەتە سەرەکیەکە: وەزارەتی کارەبای هەرێم هاوڵاتیان دڵنیا دەكاتەوە بەپێی ئەو بەرنامەیەی دانراوە، لە رێگەی سیستەمی پێوەری زیرەك و پرۆژەی رووناكی 24 كاتژمێری، دۆخی کارەبا بەرەو باشبوون دەچێت.

راگەیەندراوی فەرمی: وەزارەتی کارەبای هەرێم لە راگەیەندراوێکدا بڵاویکردوەتەوە، لە وەرزی زستانی ئەمساڵدا خواست لەسەر کارەبا 7500 مێگاواتی تێپەڕاندووە، لە کاتێکدا بەرهەمهێنانی کارەبا تەنیا 3500 مێگاواتە.

باس لەوەشکراوە: لە کابینەی نۆیەم 1500 مێگاوات بەرهەم زیادکراوە، بەڵام لە هەمانکاتدا 460 هەزار هاوبەشی نوێی کارەبا زیادبووە و خواستی كارگەكانی چیمەنتۆ و ئاسن و كارگە پیشەسازییەكانی دیكە و پڕۆژەکانی وەبەرهێنان و سیتییەكان لەسەر کارەبا زیاتربووە و نەخۆشخانەکان و پرۆژەکانی ئاو و دامودەزگا ئەمنیەکان و بەندیخانە و خاڵە سنوورییەکان کارەبای بەردەوامیان بۆ دابینکراوە، بۆیە تێکڕای کاتی پێدانی کارەبا لە ساڵی 2024دا 12:44 کاتژمێر بووە.

ئاماژە بەوەشکراوە: تێچوونی بەرهەمهێنانی کارەبا لەناو قەیرانی دارایی و کێشە تەکنیکییەکانی گواستنەوەی سوتەمەنی بۆ وێستگەکانی بەرهەمهێنانی کارەبا و هێرشەکان سەر کێڵگەکانی گاز و شوێنی کارکردنی کۆمپانیای دانەغاز؛ ئەوەندەی دیکە کاریگەریی نەرێنیان بۆ سەر بەرهەمهێنانی کارەبا دروستکردووە.