بابەتە سەرەکییەکە: ماوەی نزیکەی 10 رۆژە ئاگر لە بەشێکی دارستانەکانی کالیفۆرنیا کەوتوەتەوە و بەهۆی روداوەکەشەوە 38 هەزار و 629 هێکتار زەوی سوتاون.

بۆچی: خالید سلێمان نوسەر و چالاکوانی بواری ژینگە رایگەیاند: هۆکاری ئاگرەکە بە پلەی یەکەم بۆ هەلومەرجێکی نالەبار بە تایبەتی لە روی وشکەساڵییەوە دەگەڕێتەوە، چونکە لەو ناوچانەی ئاگرەکەی تێدا دروستبوە، لەم ساڵانەی دواییدا رێژەی دابارین کەمیکردوە و بوەتە هۆی ئەوەی زۆربەی دارستانەکان روبەڕوی وشکبون ببنەوە.

چی تر: هۆکارێکی تر بۆ ئاگرەکە هەبونی بایەکی زۆر بەهێزە کە خێراییەکەی زیاتر لە 80 کیلۆمەتر لە کاتژمێرێکدا بوە و هۆکاری سەرەکی تەشەنەسەندنی ئاگرەکە بوە.

ئەمەش هەیە: وشکەساڵی ودانەبارین لە ناوچەکە بەهۆی کاریگەرییەکانی زەریای هێمنەوەیە، چونکە وایکردوە بەردەوام پاڵەپەستۆیەکی گەرم لە زەریاوە بۆ ناوچەکە بە گشتی و کالیفۆرنیا بە تایبەتی هەبێت.

لەلایەکی ترەوە: دەکرێت بەهۆی چالاکییەکی مرۆیی، پیشەسازیی یان ئۆتۆمبێلەوە ئاگرەکە دروستبوبێت، بەڵام ئەوەی یارمەتی فروانتربونی ئاگرەکە دەدات هۆکارەکانی پەیوەستن بە گۆڕانکارییەکانی کەشوهەواوە.

ئەنجام: یەکەم کاریگەری راستەوخۆی ئاگرکەوتنەوەکە لەناوچونی دارستانەکانە، ئەو ئاگرە دەبێتە هۆی لەناوچونی ژمارەیەکی زۆر لە دارودرەخت، کە لە بنەڕەتدا سەرچاوەی سوڕی ئاو، بەخشینی ئۆکسجین، شاردنەوە و گلدانەوەی دوەم ئۆکسیدی کاربۆنن.

زانیاریی زیاتر: ساڵانێکە دەبینین لە زۆر شوێن ئاگرکەوتنەوە رودەدات، لە ئاکامیشدا رێژەیەکی زۆر دوانە ئۆکسیدی کاربۆن دەچێتە بەرهەهەواوە و چڕتربونی دوانەئۆکسیدیش لە بەرگەهەوادا دەبێتە هۆی گەرمبونی زیاتری زەوی.

زیاتر: جگە لە زیانە ژینگەیی و تەندروستی و کشتوکاڵییەکان، باس لەوەدەکرێت کە ئاگرەکەی کالیفۆرنیا زیانی 150 ملیار دۆلاری بە ئابوری ئەمەریکا گەیاندوە.