بابەتە سەرەکییەکە: گرفتی سەدان خوێندکاری ماستەر و دکتۆرا چارەسەر کرا کە وەک وانەبێژ دامەزراون.

راگەیەندراوی فەرمی: وەزارەتی خوێندنی باڵا و توێژینەوەی زانستی بڵاویکردەوە: سەرۆکایەتی ئەنجومەنی وەزیران رەزامەندی دا لەسەر ئەوەی ئەو کەسانەی کە وەک وانەبێژ دامەزران و لە ئێستادا خوێندکاری خوێندنی ماستەر یاخود دکتۆران، مافیان پارێزراو دەبێت و لە خوێندن بەردەوام دەبن.

دەقی راگەیەندراوەکەی وەزارەتی خوێندنی باڵا:

لەسەر راسپاردەى د. ئارام محمد قادر وەزیرى خوێندنى باڵا و توێژینەوەى زانستى، سەرۆکایەتى ئەنجومەنى وەزیران رەزامەندى دا لەسەر ئەوەى ئەو بەڕێزانەى کە بە گرێبەست دامەزراون وەک وانەبێژ و لە ئێستادا قوتابى و خوێندکارى خوێندنى باڵان ماستەر یاخود دکتۆرا، مافیان پارێزراو دەبێت و لە خوێندن بەردەوام دەبن تاکو تەواوکردنى قۆناغى خوێندنەکەیان.
هەر لە فەرمانە وزارییەکەى وەزیرى خوێندنى باڵا و توێژینەوەى زانستیدا هاتوە؛ دواى تەواوکردنى خوێندنەکەیان ڕێکارەکانى بە گرێبەست کردن و دەستبەکاربونیان بۆ ئەنجام دەدرێت بەو مەرجەى بەکردارەکى وانەبێژ بوبن و مەرجەکانى دامەزراندیان بە گرێبەست تێدابێت، واتە لە یەک کاتدا هەردوو مافى (خوێندن) و (دامەزراندنیان) پارێزراو دەبێت.