بابەتە سەرەکییەکە: قوباد تاڵەبانی جێگری سەرۆکوەزیرانی هەرێم پێشوازیکرد لە تۆبیاس لیندنەر وەزیری دەوڵەت و رێکخەری تایبەتی وەزارەتی دەرەوەی ئەڵمانیا بۆ کاروباری سوریا.

راگەیەندراوی فەرمی: نوسینگەی راگەیاندنی جێگری سەرۆکوەزیران بڵاویکردەوە: لە کۆبونەوەکەدا قوبد تاڵەبانی سوپاسی هاوکارییەکانی حکومەتی ئەڵمانیای کرد بۆ هەرێمی کوردستان و هیوای خواست لە داهاتودا هاوکارییەکانی ئەو وڵاتە لەگەڵ حکومەتی هەرێم زیاتر پەرەبسێنێت.

چی تر: لە تەوەری سەرەککی کۆبونەوەکە لەبارەی هەوڵەکانی کابینەی نوێی حکومەتی هەرێم گفتوگۆکرا و قوباد تاڵەبانی رایگەیاند: کۆبونەوەکانی نێوان لایەنە سیاسییەکان بە تایبەتی یەکێتی و پارتی بەردەوامە و هیوادارم گفتوگۆکان بە زویی بە ئەنجام بگەن.

هاوکات: جێگری سەرۆکوەزیران ئاماژەی بەوەدا: یەکێتی هەوڵدەدات حکومەتی داهاتو لەسەر بنەمای هاوبەشی راستەقینە پێکبهێنرێت، چونکە بەبێ هاوبەشی راستەقینە حکومەتێکی کارا و یەکگرتو و بەهێز دروستنابێت کە بتوانێت کێشەکان چارەسەر بکات.

دواتر: باسی ریفۆرم لە هێزی پێشمەرگەدا کرا و لەمبارەیەشەوە قوباد تاڵەبانی وتی: هەمو هەوڵێک دەدەین بۆ ئەوەی پڕۆسەکە بەوشێوەیە جێبەجێ بکرێت کە بە هاوکاری هاوپەیمانان پلانی بۆ دانراوە، بۆ ئەوەی پڕۆسەکەش بە خێرایی بەڕێوەبچێت پێویستە حکومەتی داهاتو حکومەتێکی بەهێز بێت.

ئەمەش هەیە: لە تەوەرێکی تری کۆبونەوەکە باسی دۆخی سوریا و ئاسایشی ناوچەکە کرا و باس لەوەشکرا، کە سوریا بە دۆخێکی هەستیاردا تێپەڕدەبێت و هیوایان خواست لایەنەکانی ئەو وڵاتە لە رێگەی گفتوگۆوە ناکۆکییەکان  چارەسەر بکەن.

زیاتر بزانە: هەر لەم چوارچێوەیەدا جەختکرایەوە کە پێویستە هەمو پێکهاتەکانی سوریا بە تایبەتیش کورد، وەک پێکهاتەیەکی گرنگ بەشداری پێبکرێت لە داڕشتنەوەی سیستمی سیاسی نوێی سوریا.