بابەتە سەرەکیەکە: بافڵ جەلال تاڵەبانی، سەرۆکی یەکێتی نیشتمانی کوردستان لە دەباشان پێشوازی لە یان برێم، کونسوڵی گشتیی فەڕەنسا لە هەرێم کرد.

راگەیەندراوی فەرمی: نوسینگەی راگەیاندنی سەرۆکی یەکێتی بڵاویکردەوە: لەدیدارێکدا دواین گۆڕانکارییە سیاسییەکان لەسەر ئاستی ناوچەکە، پێکهێنانی حکومەتی هەرێم و کێشەکانی نێوان هەولێر و بەغدا گفتوگۆیان لەبارەوەکرا.

ئەمەش هەیە: بافڵ جەلال تاڵەبانی لەبارەی رێکخستنەوە و یەکڕیزی ماڵی کورد و یەکگوتاری سیاسی راشکاوانە دوا و وتی؛ هەر بڕیارێک لەبەرژەوەندی چارەسەری کێشەکانی ژیانی خەڵک و هەرێمەکەمان بێت لەگەڵیداین بەڵام دەبێت نیەتی جدی هەبێت بۆ کارکردنی پێکەوەیی و هاوبەشێتی راستەقینە چونکە هەر هەوڵێک لە دەرەوەی ئەم ویستە نیشتمانییە بە زیان بۆ گەلەکەمان دەشکێتەوە.

هاوکات: سەرۆکی یەکێتی رونیشیکردەوە، ئەرکی هەموانە بەرپرسیارانە لەگەڵ ئەم دۆخەدا مامەڵە بکەن و پێکەوە هەنگاوبنێن بۆ دروستکردنەوەی متمانە و پێکهێنانی حکومەتێکی خزمەتگوزار کە بە یەکسانی خزمەتی هەموان بکات و لەئاست داواکاری خەڵکیشدابێت.

زیاتر: سەبارەت بە سوریا و رۆژئاوای کوردستان بافڵ جەلال تاڵەبانی رایگەیاند؛ جەختدەکەینەوە کە لەگەڵ ئەوەداین رێز لە ئیرادە و مافی هەمولایەک بگیرێت و کوردیش بەشێکی گرنگ بێت لە سوریای نوێدا چونکە هەر پەراوێزخستنێک زیان بە ئارامی و ئاسایشی وڵاتەکە و ناوچەکەش دەگەیەنێت.