بابەتە سەرەکییەکە: سەعدی ئەحمەد پیرە رایگەیاند،''كیمیابارانكردنی هەڵەبجە
كارەساتێكی گەورەبوو و توانرا بگەیەنرێتە پایتەختی وڵاتانی دونیا، ئەمەش هەموو جیهانی
بەئاگاهێنا و وەرچەرخانێكی گەورە بوو لەشۆڕش و مێژووی كوردیدا.''
لێدوانی فەرمی: سەعدی ئەحمەد پیرە وتەبێژی یەکێتی نیشتمانی کوردستان لە یادی
کیمیابارانکردنی هەڵەبجە رایگەیاند، ''پێویستە وانە لە کارەساتی هەڵەبجە وەربگرین
و پارێزگاری لەبوونی خۆمان بكەین و تواناكانمان بخەینەگەڕ بۆ رێگریكردن لەدووبارە
بوونەوەی كارەساتی لەمشێوەیە".
ئەوەشی وت: ئەركی حكومەتی عێراقە قەرەبووی زیانلێكەوتووان و كەسوكاری
شەهیدانی هەڵەبجە بكاتەوەو سەنتەرێكی توێژینەوەی تەندروستی بۆ چارەسەركردنی كاریگەرییەكانی
كیمیایی لەسەر خاك و ئاو بەروبومی هەڵەبجە دابمەزرێنێت، چونكە تاوەكو ئێستا كاریگەری
ئەو چەكە لەسەر بەركەوتووان و ژینگەی هەڵەبجە هەرماوە.