بابەتە سەرەکییەکە: ئاوات شێخ جەناب وەزیری دارایی و ئابوری سەردانی پارێزگای سلێمانی کرد و لەلایەن هەڤاڵ ئەبوبەکر پارێزگاری سلێمانییەوە پێشوازی لێکرا.

راگەیەندراوی فەرمی: وەزارەتی دارایی بڵاویکردەوە: لە کۆبونەوەکەدا وەزیری دارایی جەختی لەسەر هەماهەنگی و کارئاسانی لەلایەن فەرمانگەکانی وەزارەتەوە بۆ راییکردنی مامەڵە و کاری هاوڵاتییان کردەوە.

دەقی راگەیەندراوەکەی وەزارەتی دارایی:

ڕۆژی دووشەممە ( ٢٠٢٥/٣/١٧ ) بەڕێز ئاوات شێخ جەناب وەزیری دارایی و ئابووری سەردانی پارێزگای سلێمانی کرد و لەلایەن بەڕێز دکتۆر هەڤاڵ ئەبوبەکر پارێزگاری سلێمانیەوە پێشوازی لێکرا.                        
لەدیدارێکدا گفتوگۆ لەسەر کێشە و گرفتە داراییەکانی پارێزگای سلێمانی کرا و بەڕێز ئاوات شێخ جەناب پشتیوانی خۆی بۆ خزمەتکردنی زیاتری پارێزگای سلێمانی و دام و دەزگاکانی دووپات کردەوە، لای خۆشیەوە پارێزگاری سلێمانی سوپاسی وەزیری دارایی کرد کە بەدرێژایی چەند ساڵی ڕابردوو خەمخۆری جددی بوون بۆ چارەسەرکردنی کێشە و گرفتەکان هەرچی لەدەستیان هاتبێت بۆ خزمەتی ئەو دەڤەرە درێغییان نەکردووە.                                
هاوکات هەر لە پارێزگای سلێمانی بەسەرپەرشتی بەڕێز وەزیری دارایی و ئامادەبوونی بەڕێزان دکتۆر هەڤاڵ ئەبوبەکر پارێزگاری سلێمانی و شاهۆ عوسمان و ئەحمەد علی جێگرانی پارێزگار و دکتۆر کەمال تەیب بەڕێوەبەری گشتی باجەکان و خانووبەرەی میری لە وەزارەتی دارایی و شاڵاو جەمال بەڕێوەبەری گشتی کشتوکاڵی سلێمانی و ئاسۆ قادر بەڕێوەبەری خانووبەرەی میری سلێمانی، کۆبوونەوەیەک لەسەر هەماهەنگی نێوان فەرمانگە پەیوەندیدارەکانی سلێمانی و وەزارەتی دارایی لەسەر پرسی بەکرێدانی ئەو زەویانەی کە موڵکی وەزارەتی دارایین بەڕێوەچوو، لە کۆبوونەوەکەدا بەڕێز وەزیری دارایی جەختی لەسەر هەماهەنگی و کارئاسانی لەلایەن فەرمانگەکانی وەزارەتەوە بۆ ڕاییکردنی مامەڵە و ئیش و کاری هاووڵاتیان کردەوە و ڕایگەیاند لە چوارچێوەی یاسا و ڕێنمایی و جێبەجێکردنی بڕیارەکانی ئەنجومەنی وەزیران ئامادەی هەموو هاوکاریەکین بۆ خزمەتی زیاتری پارێزگای سلێمانی