بابەتە سەرەکیەکە: بەڕێوەبەرایەتی پۆلیسی پارێزگای سلێمانی، لەبارەی روداوەکەی شه‌وی‌ رابردوی‌ گوندی گرێزەی سەر بە قه‌زای‌ سه‌یدسادق راگەیەندراوێکی بڵاوکردەوە.

راگەیەندراوی فەرمی: بەڕێوەبەرایەتی پۆلیسی پارێزگای سلێمانی رایگەیاند؛ دوای‌ ئه‌وه‌ی‌ كاتژمێر 11:10 خوله‌كی‌ شه‌وی‌ رابردو، هێزه‌كانی‌ پۆلیس ئاگاداركرانه‌وه‌ له‌ روداوێكی‌ ته‌قه‌كردن له‌ ماڵێكی‌ گوندی‌ گرێزه‌ی‌ سه‌ر به‌ قه‌زای‌ سه‌یدسادق، ده‌ستبه‌جێ مه‌فره‌زه‌كانی‌ بنكه‌ی‌ پۆلیسی‌ سه‌یدسادق گه‌یشتنه‌ شوێنی‌ روداوه‌كه‌.

ئەمەش هەیە: به‌پێی‌ لێكۆڵینه‌وه‌ سه‌ره‌تاییه‌كانی‌ پۆلیس ده‌ركه‌وت كه‌ به‌هۆی‌ كێشه‌ی‌ خێزانییه‌وه‌ یه‌كێک له‌ئه‌ندامانی‌ خێزانه‌كه‌ به ‌ناوی‌ (به‌شیر سالار محمد له‌دایكبوی‌ 1998) به‌چه‌كی‌ جۆری‌ كڵاشینكۆف ده‌ستڕێژی‌ له‌ئه‌ندامانی‌ خێزانه‌كه‌ی‌ كردوه‌ كه‌ پێكهاتون له ‌باوک و دایكی، دوو خوشک ‌و برایه‌كی‌ كوشتوه‌، دواتر خۆشی‌ كوشتوه‌.

زیاتر: له‌لایه‌ن تیمه‌كانی‌ به‌ڵگه‌ی‌ تاوانه‌وه‌ كه‌شف ‌و هێڵكاری‌ بۆ شوێنی‌ روداوه‌كه‌ ئه‌نجامدراو سه‌رجه‌م به‌ڵگه‌كان كۆكرانه‌وه‌ و ده‌ستبه‌ر ئه‌و چه‌كه‌دا گیرا كه‌ تاوانه‌كه‌ی‌ پێ ئه‌نجامدراوه‌، هه‌روه‌ها ته‌رمه‌كان بۆ پزیشكی‌ دادوه‌ری‌ گواسترانه‌وه‌.

چی تر: به‌بڕیاری‌ به‌ڕێز دادوه‌ر په‌ڕاوی‌ لێكۆڵینه‌وه‌ بۆ روداوه‌كه‌ كراوه‌ته‌وه‌ و لێكۆڵینه‌وه‌كانی‌ پۆلیس به‌رده‌وامه‌ بۆ ئاشكراكردنی‌ هۆكاری‌ روداوه‌كه‌.

كوژراوه‌كان پێكهاتون لە؛

- سالار محمد عه‌بدولكه‌ریم له‌دایكبوی‌ 1970.

- نیهاد قادر ساڵح له‌دایكبوی‌ 1975.

- سیما سالار محمد له‌دایكبوی‌ 2005.

- سه‌هه‌ند سالار محمد له‌دایكبوی‌ 2015.

- یارا سالار محمد له‌دایكبوی‌ 2018.

- به‌شیر سالار محمد له‌دایكبوی‌ 1998 (بكوژ).