لێپرسراوی راگەیاندن و پەیوەندییەکانی تەندروستی سلێمانی، چەند رێنماییەکی سەبارەت بە خۆڵبارین بڵاوکردووەتەوە و دەڵێت، پێویستە هاوڵاتییان رەچاویان بکەن.
سامان لەتیف لێپرسراوی راگەیاندن و پەیوەندییەکانی بەڕێوەبەرایەتی گشتی تەندروستی سلێمانی رایگەیاند:" خۆڵبارین راستەوخۆ کاریگەرییەکانی بۆسەر تەندروستی هاوڵاتییان دەبێت و هەڵمژینی ئەو هەوایەی بووە بە تەپوتۆز بەشێوەیەکی گشتی بۆ تەندروستی مرۆڤ باش نییە".

بە وتەی سامان لەتیف خۆڵبارین ئەم کاریگەرییانەی هەیە :

 ١- دەبێتە هۆی هەستیاری حەساسییەت و پێڵووی چاوەکان سوردەبنەوە و توشی خوران دەبێت.
٢- هەستیاری لوت و بەتایبەت تر ناوپۆشی لوت سور دەبێتەوە تووشی هەوکردن دەبێتەوە بەمەش گیرانی لوت دروست دەبێت و کەسەکە تووشی تەنگەنەفەسی دەبێت.
۳- فشاری خوێن و خوێن بەربوون و هەوکردنی گوێچکەی ناوەڕاست زۆر جار دەرئەنجامی ئەم خۆڵبارینەیە و کاریگەری دروست دەکات لەسەر ئەو کەسە.
٤- ئەو کەسانەی تەنگە نەفەسن و ڕەبۆیان هەیە لەگەڵ ئەم خۆڵبارینە حاڵەت و نیشانەکانیان زیاد دەکات.
٥- زۆر جار دەبێتەهۆی خورانی پێست و سوربوونەوە و نەخۆشی ئێکزیما.
٦- کاریگەری لەسەر کۆئەندامی هەناسەدان و سییەکان دروست دەکات و بەمەش کەسەکە تووشی کۆکە و پژمین و ناڕەحەتی زۆر دەبێت چونکە ئەو دەنکۆڵانە هەڵگری میکرۆب و بەکتریان.

هاوکات سامان لەتیف ئاماژە بەوەدەکات کە پێویستە لەکاتی خۆڵبارین پابەندی چەند رێنماییەکبن، کە ئەوانیش بریتین لەمانە:

١- داخستنی دەرگا و پەنجەرە و پاککردنەوەی شوێنی خۆڵبارین بە تایبەت بۆ ئەو کەسانەی لە ماڵەوەن.
٢- لە کاتی چونە دەرەوە دەمامک ببەسترێ و ڕوو پۆشی خۆت و شوێنی مانەوە بکەی بەبەردەوامی.
۳- دەرگا و پەنجەرە دابخە ئەگەر بۆ حاڵەتی زۆر پێویست نەبێت مەچۆ دەرەوە.
٤- زۆر خواردنەوەی شلەمەنی بەتایبەت لەکاتی شۆفێری و چونە دەرەوە هەوڵبدرێت هەوای ناو ئۆتۆمبێل بکرێتەوە.
٥- خواردنی میوە و سەوزە بەبەردەوامی.
٦- تێکەڵ نەبوونی هاوڵاتیان و مامەڵە نەکردنیان لەگەڵ سەگ و پشیلە کە لە ئێستادا لەلایەن هاوڵاتیانەوە گرنگی زۆری پێدەدرێت ، چونکە ئەو تۆز و خۆڵە لەگەڵ فەرووی ئاژەڵەکان کێشە دروست دەکات.

لە شەوی رابردووەوە شەپۆلێکی خۆڵبارین ناوچەکەی بە گشتی گرتووەتەوە و بە وتەی بەرپرسی راگەیاندنی تەندروستی کەرکوکیش، لەماوەی ٢٤ کاتژمێری رابردوودا زیاتر لە ١٨٠ کەس بەهۆی کاریگەرییەکانی خۆڵبارینەوە سەردانی نەخۆشخانەکانی سنووری پارێزگاکەیان کردووە.