بابەتە سەرەکیەکە: هاوسەرۆکی فراکسیۆنی دەم پارتی لە پەرلەمانی تورکیا رایگەیاند، شاندی ئیمراڵی دەم پارتی لە چەند رۆژی داهاتودا سەردانی بەڕێز ئۆجالان دەکەن.

لێدوانی فەرمی: گوڵستان کلچ کۆچیگیت، هاوسەرۆکی فراکسیۆنی پارتی یەکسانی و دیموکراسی گەلان دەم پارتی لە پەرلەمانی تورکیا کۆنگرەیەکی رۆژنامەنوسی ئەنجامدا و رایگەیاند: لە چەند رۆژی داهاتودا شاندەکەمان دەچێتەوە ئیمراڵی و پەیوەست بەوەوە ئەمڕۆ یان سبەی داواکاری ئەنجامدانی دیدار پێشکەش دەکرێت.

ئەمەشی وت: لە سەردانی ئیمراڵییدا بە تایبەت زانیاری لەسەر سەردانەکانی باشوری کوردستان و ئەو گفتوگۆیانەی کراون بە بەڕێز ئۆجالان رادەگەیەندرێت، دوای چاوپێکەوتنەکە کاتی راگەیاندنی بانگەوازییە مێژوییەکەی بەڕێز ئۆجالان دیاری دەکرێت، کە لە چارەسەری پرسی کورد دا دەبێتە قۆناغی سەردەمێکی نوێ.

زیاتر: ئەو کردە و رێگرییانەی گورز لەم زەمینە هاوپەیمانی و هاوبەشەیی تورک و کورد دەدەن و ئاستەنگی بۆ دروست دەکەن، دەبێت لەلایەنی سیاسی و کۆمەڵگەوە شەرمەزار بکرێن.

چی تر: دوای ئەوەی ئەم بانگەوازییە مێژوییە دەکرێت، داوا لە پەرلەمان دەکەین بە بەرپرسیارێتی خۆی هەستێت، بکەوێتە ژێرباری بەرپرسیارێتی خۆی و گۆڕین و هەمواری یاسایی بۆ جێبەجێکردنی پێویستییەکانی بانگەوازەکە بکات و دەستبەجێ هەنگاوبگرێتەبەر.