بابەتە سەرەکیەکە: چاودێرێکی سیاسی رایگەیاند، پەیامەکەی عەبدوڵا ئۆجەلان پرسی کوردی لە شەڕ و تیرۆرەوە گۆڕی بۆ پرسێکی سیاسی و دیبلۆماسی.

لێدوانی تایبەت: محەمەد ئەمین پێنجوێنی، نوسەر و چاودێری سیاسی بە BMC راگەیاند: بە دیدی من پەیامێکی مێژوی بو، پەیامەکەی عەبدوڵا ئۆجەلان پرسی کوردی لە شەڕ و تیرۆرەوە گۆڕی بۆ پرسێکی سیاسی و دیبلۆماسی، رێگەچارەیەکی ئاشتییانە و دیالۆگە.

ئەمەشی وت: بەهۆی پەیامەکەی ئۆجەلانەوە، کورد هاتەوە نێو مەیدانی سیاسی وڵاتانی جیهان لەسەروی هەمویانەوە ئەمریکا، بۆ گەلی کورد زۆر ئەرێنی و باشبو.

زیاتر: هەوڵەکان و لێدوانەکانی دەوڵەت باخچەلی گرنگ و پێویست بون کە رایگەیاند، کورد و تورک پێویستە بەیەکەوە بژین لە ئاشتیدا، پەیامەکەی ئۆجەلان تۆپەکەی خستە مەیدانی تورکیاوە و دەیەوێت بە ئاشتی کێشەکان چارەسەر بکات.

چی تر: ئۆجەلان دۆزی کوردی لە قۆناغێکەوە برد بۆ قۆناغێکی پێشکەوتوتر، تا لەرێگەی خەباتی سیاسی و دیبلۆماسییەوە گەلی کورد مافەکانی خۆی بسێنێت و ئاشتی باڵ بەسەر ناوچەکەدا بکێشێت.

هاوکات: سەبارەت بەوەی کە ئایا پەکەکە گوێڕایەڵی پەیامەکەی ئۆجەلان دەبێت محەمەد ئەمین پێنجوێنی وتی؛ لەنێو ریزەکانی پەکەکەدا هیچ و کەس و گروپێک نیە سەرپێچی پەیامەکەی ئۆجەلان بکات و لێی لابدات.