بابەتە سەرەکیەکە: بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان لەگەڵ زیاد جەبار، لێپرسراوی مەڵبەندی رێکخستنی سلێمانی کۆبووەوە.

راگەیەندراوی فەرمی: نوسینگەی راگەیاندنی سەرۆکی یەکێتی بڵاویکردەوە: لە کۆبوونەوەکەدا دوایین ئامادەکارییەکانی یەکێتی بۆ هەڵبژاردن لە سنووری سلێمانی هەڵسەنگاندنیان بۆ کرا و جەخت لە پابەندبوون بە بنەما رێکخراوەییەکان کرایەوە بەشێوەیەک لە چوارچێوەی پاراستنی مافەکانی خەڵک و خزمەتی گشتیدا بێت.

زیاتر: بافڵ جەلال تاڵەبانی ئاماژەی بەوەکرد: سلێمانی لە دڵماندایە، هیچ دەستکەوتێکی حزبی لە ژیانی هاوڵاتییەکی شارەکە گرنگتر نییە و هیچ هەنگاوێکیش نانێن ئەگەر لەخزمەتی خەڵکەکەیدا نەبێت.

چی دیکە: سەرۆکی یەکێتی وتیشی: ئەوەی ئەم شارە و خەڵکەکەی بە کوردستانیان بەخشیوە زۆر زیاترە لەوەی کە بۆیان کراوە، ئەو جیاکاری و نادادییەش کە لە رابردوودا بەرامبەر شارەکە کرا، مەرامێکی شکستخواردوو بوو بۆ بێدەنگکردنی ئەو شارەی هەرگیز پشتی لە هەڵوێستە جوامێرانە و مەردانەکانی نەکردووە.

هاوکات: بافڵ جەلال تاڵەبانی ئاماژەی بەوەشکرد: ئەمجارە پێکەوە لەگەڵ خەڵکە خۆشەویستەکەمان بە ورەیەکی پۆڵایین و ئیرادەیەکی تۆکمەوە بەرەو گۆڕانکاریی ریشەیی هەنگاودەنێین و قۆناغێک دەهێنینە کایەوە کە تێیدا مافی هەمووان پارێزراوبێت و ژیانی هاوڵاتییان نەکرێتە قوربانیی بەرژەوەندییە تایبەت و حزبییەکان.