چی روویدا: رێبەری باڵای کۆمارى ئیسلامیى ئێران،
پاش پێنج ساڵ وتارى هەینى لە تاران پێشکەش کرد وتی، ئەگەر پێویست بکات جارێکى دیکە
هێرش دەکەنەوە سەر ئیسرائیل.
پەیامی فەرمی: عەلی خامنەیی، رێبەری باڵای کۆمارى
ئیسلامیى ئێران دەڵێت:" دوژمنی گەلی ئێران هەمان دوژمنی گەلی فەلەستین،
لوبنان، عێراق، میسر، سوریا و یەمەنە و ژووری فەرمانیان یەک شوێنە، بەڵام شێوەی
کارکردنیان لە وڵاتانی جۆراوجۆر، جیاوازە.''
ئەمەشی وت: دەستدرێژیکاران
دەیانەوێت جیاوازی لە نێوان گەلانی موسوڵمان دروستبکەن و دەیانەوێت وڵاتانی ئیسلام
پێکەوە نەبن و دڵ و جەستەیی موسڵمانان بەرامبەر یەکیتر نەهێڵێن.
چی تر: عەلی
خامنەیی باسی لەوەشکرد:" دەبێت پشتێنی بەرگریی سەربەخۆی خۆمان لە
ئەفغانستانەوە بۆ یەمەنە لە ئێرانەوە بۆ غەززە توند بکەن، گوتیشی "ئێمە بۆ
جێبەجێکردنی یاساکانی ئیسلام کەمتەرخەمیمان نەکردووە"
ئەمەش هەیە: وتارەکەی خامنەیی بەبۆنەی رێوڕەسمی رێزلێنان بوو لە حەسەن نەسروڵا،
ئەمینداری گشتیی حیزبوڵای لوبنان و عەباس نیلفرووشان، فەرماندەی باڵای سوپای
پاسداران، کە لە 27ـی ئەیلول لە هێرشی
مووشەکیی ئیسرائیلدا بۆ سەر بنکەی سەرەکیی حیزبوڵا لە بەیروت کوژران.